Previdens redemptor noster mortales homines casibus mundialibus obvolutos, hoc salutis remedium illis concessit, ut peccata sua dum adhuc vacat et in hoc corpore degunt redimentes, eterna sibi premia adquirere possint. Quapropter ego, in Dei nomine, Ildinus, pro anima filii mei Gauzeranni, dono Deo et sanctis ejus apostolis Petro et Paulo, ad locum Cluniacum, de mea hereditate quę sita est in pago Matisconensi, in villa Curciaco, hoc est duas vineas, quę terminant a certio terra Sancti Petri, a mane terra Bernonis et Aalgardis, a medio die via publica, a sero Sanctę Cecilię; alia vinea terminat ex omnibus partibus terra Aalgerii et Waldalmodis et Constantini. Dono etiam unum servum, nomine Ingelbertum, cum uxore sua et infantibus eorum. Facio autem hanc donationem pro anima uxoris mee nomine Annæ et filii mei Gauzeranni, in tali conventu ut ab hodierna die et deinceps faciant monachi de supradicto loco quicquid facere voluerint, et ut nullus homo aliquam consuetudinem vel servitium presumat requirere. Quod si quis huic nostræ donationi aliquam calumpniam inferre presumpserit, omnibus maledictionibus divinę legis incurrat, et cum diabolo et angelis ejus in eternum pereat. S. Ildini. S. Walterii Rodulfi. S. Gisleberti. S. Hugonis. S. Lamberti. S. Gondulrici. S. Uberti.