Charta qua Petrus dat monasterio Cluniacensi mansum in villa Boscos.
In nomine Verbi incarnati. Notum sit omnibus christianis presentibus et futuris, quod ego Petrus, reminiscens pondus peccatorum meorum, unde valde aggravatus sum, et timeo ut in eterno juditio patiar penas, propter hoc dono Deo et Sanctæ Mariæ, necnon et Sancto Petro et Paulo et omnibus sanctis, ac Cluniaco loco, pro anima mea et omnium parentum meorum, aliquid de rebus meis quę sunt site in pago Arvernico, in villa quę dicitur Boscos: hoc sunt tres apendarię et unus mansus et terræ cum pratis et campis et silvis, et quęcumque ad ipsos pertinent, et de aliis terris quę sunt juxta istas supradictas, quas habeo in commune cum fratre meo Artaldo, de silvis et de aliis terris dono similiter meam partem, ut faciant ejusdem loci rectores quicquid eis placuerit. Si quis hanc donationem corroborare et custodire vel gubernare voluerit, Domini benedictio super eum descendat. Si quis calumpniare voluerit, et injuste aliquid ibi requirere voluerit, Dei ira veniat super eum, et cum Juda traditore et Datan et Abiron pars ejus in inferno habeatur, nisi a stultitia et a malicia resipuerit. S. Petri. S. Stephani, fratris mei, qui mihi dedit partem suam quam ibi habebat. S. Artaldi, fratris mei, qui hoc laudavit, et multorum aliorum nostrorum fidelium, qui hoc laudaverunt et viderunt.