Charta qua Costabilis et uxor ejus dant monasterio Cluniacensi vineam in villa Verziaco.
In nomine summe et individuę Trinitatis. Ego Costabilis, in ultimis vitę positus, dono Deo et sanctis ejus apostolis Petro et Paulo, ad locum Cluniacum, de mea hereditate quę sita est in pago Matisconensi, in villa Verziaco, hoc est vinea quę terminatur via publica a mane, et de omnibus aliis partibus terra Sancti Petri. Facio autem hanc donationem pro remedio animę meę et loco sepulturę. Et ut firmum sit, testes subter adscripti manu tactu firmaverunt. S. Costabilis et uxoris ejus. S. Ainardi. S. Adalardi, filiorum eorum. S. Constantini presbiteri. S. Gondranni, S. Ingelberti. S. Rainoardi.