Dum legaliter quibusque fidelium conceditur, ut supra. Igitur ego Bermundus et uxor mea Gisla donamus sacrosancto et exorabili loco Cluniaci, in honore Dei sanctorum apostolorum Petri et Pauli consecrato, et domno Odoni abbati, ejusque successoribus ac monachis, Deo opitulante, sub ipsis degentibus, villam juris nostri, vocabulo Boliniacum, cum ecclesia in honore sancti Stephani consecrata, et mancipiis utriusque sexus, et villulis vel cęteris cunctis appendiciis atque adjacentiis, quę ad ipsam villam aspiciunt vel aspicere videntur. Verum eo tenore ut nos ab ipso abbate vel a suis monachis accipiamus villam Ambariacum cum ęcclesia et omnibus appendiciis suis in nostro dominio ac filii nostri Hugonis, ut quandiu vixerimus utrasque res possideamus, et singulis annis solvamus censu, sollemnitate predictorum apostolorum, solidos VI rectoribus prefati monasterii; post discessum vero nostrum, predictę villę cum suis ęcclesiis et appendiciis ad jam dictum locum perveniant. S. Bermundi, Gislę uxoris ejus, Hugonis filii illorum, Teotonis, Gisiardi, Bremundi, Amblardi, Achardi, Warembaldi, Odonis, Ansegisi, Arulfi, Tetberti, Beroldi. Actum Pruliaci villę anno IIII regnante Ludowico rege. Jacob scripsit III nonas aprilis.