In nomine summę et individuę Trinitatis. Ego Ugo dono Deo et sanctis ejus apostolis Petro et Paulo, ad locum Cluniacum, pro filio meo Humberto, quem trado ad serviendum Deo in jam dicto cenobio, aliquid de mea hereditatę quę sita est in pago Viennense, in villa Cociaco: hoc est unum clausum de vinea, qui terminatur de duabus partibus viis publicis, et de tercia parte terra Sancti [Petri?] de ipsa hereditatę. Faciant autem ab hodierna die et deinceps quicquid facere ad utilitatem loci voluerint rectores Sancti Petri; et ut firmum permaneat, manu propria firmavi, testibusque tradidi roborandam.