Domno et sacrosanctę ecclesię Cluniacensi que est constructa in honore apostolorum Petri et Pauli, ubi domnus Aimardus abbas preesse videtur. Ego, in Dei nomine, Euratdus dono aliquid de rebus meis, hoc est curtilum cum vinea insimul tenente, in villa Flaviaco; ipse curtilus et ipsa vinea terminatur de tribus partibus muro manufacto, a sero de ipsa hereditate, et habet in longum perticas XX, in una fronte perticas VI, in alia fronte perticas V. Infra istas terminationes, et dono tibi campum Nivaleles vocat; terminat a mane terra Sanctę Marie, a medio die et a circio via publica, a sero terra Sancti Cyrici. Infra istas terminationes, ipsum curtilum et ipsam vineam et ipsum campum, ea ratione dum Erardus advixerit usufructum habeat; post suum discensum ad Sanctum Petrum perveniat, loco sepulturę, sine ullo contradicente, et per singulos annos sextarios de vino in vestituram. S. Euratdi et uxoris sue Eldeardis, qui fieri et firmari rogaverunt. S. Seiverti. S. Frogerii. S. Leofredi. S. Christieni. Benedictus scripsit, datavit die jovis, in mense januario, anno XVII regnante Ludovico rege.