Noticia commendationis quam venerabilis memoriæ Maiolus abbas fecit Humberto de his obedientiis, Algoio videlicet, Pola, Scotiolas, Arpagiaco, ita dicens: «Commendo tibi has supranominatas obedientias ad custodiendum ac defendendum a malis et perversis hominibus, in loco satisfactionis et emendationis pro innumeris malis quę nobis fecisti, pro quibus te excommunicare volebamus; ita tamen ut pauperibus nostris reddas quæ eis tulisti. Facio autem hanc comendationem tibi, non ut aliquem censum per consuetudinem requiras in his obedientiis, quod cum summa diligentia et omni adnimadversione {corr: animadversione} interdico et excommunico, nisi tantum, si transitum habueris juxta obedientiam, cum sex aut decem militibus, et monachus spontanee te ammonuerit, reficias, et, post refectionem, viam tuam teneas nec jacere ibi presumas.» Signum Alberici comitis, qui hanc noticiam laudavit.