Notitia donationis quarumdam rerum a Warnerio et Heinrico monachis et ab aliis monasterio Cluniacensi factæ.
Notum sit cunctis fidelibus quod Warnerius monachus et Heinricus postea, Deo permittente, monachus factus, filii Arberti, dederunt partes suas Domino Deo et sancto Petro ad locum Cluniacum, et Frogerius similiter, si heredem legalem non habuisset, post suum discessum; si vero filium legalem habuisset, ipse filius II solidos in censum omni anno persolveret Sancto Petro. Similiter Oddo, frater ejus, firmavit ipsam convenientiam de eisdem rebus, ut scilicet ille qui superviveret, teneret in vita sua; heredes vero, si legales essent, redderent censum supradictum; si legales non essent, remaneret terra Sancto Petro. Si quis sane hoc donum et hanc convenientiam contradixerit, non optineat quod vult, insuper convictus publica potestate VII libras auri persolvat; et hęc donatio firma et stabilis permaneat.
S. Rainaldi, S. Walonis, S. Archimbaldi, qui testes fuerunt hujus convenientię.