Quotiens rationabili exigente causa contigerit ut aliquis fidelium aliquas ęcclesiastico jure subditas more precario sibi largiri petierit, tanta id debet auctoritate fulciri quatenus nullę humane mentis mutabilitate a succedentibus possit vacuari. Igitur in nomine sancte et individue Trinitatis, noverint cuncti tam presentes quam futuri, quod ego Maiolus, favente Christi gratia, Cluniacensium abba, cum consensu fratrum, dono cuidam clerico, genere non ignobili orto, vocabulo Maiolo, et consanguineo ipsius cuidam viro, nomine Rodulfo, quandam terram Beati Petri sitam in pago Matisconensi; hoc est ęcclesiam Sancti Saturnini cum appenditiis suis, eo tenore ut quamdiu ipsi duo vixerint, teneant et possideant; set post illorum decessum sine mora perveniat ad Sanctum Petrum. Volumus etiam ut omnibus annis, in festivitate apostolorum Petri et Pauli, jam dictus Rodulfus sex denarios in cera, ad opus Sancti Petri, in vestitura persolvat. Et huic precarię subscripsimus firmarique rogavimus nostris fratribus.