Charta qua Anna et filius ejus Mainbertus dant monasterio Cluniacensi res suas in locis qui vocantur ad Volofonum, super Chalboum et Marchisoyt.
Domino Deo et sanctis ejus apostolis Petro et Paulo et donno Maiolo, abbati venerabili de Cluniaco, et ceteris fratribus, futuris vel presentibus. Ego Anna et filius meus Maynbertus, pio amore et bona voluntate donamus aliquas res nostras quę sunt sitę in pago Matisconense, in agro Prisciaco, ubi ad Volofonum vocant, hoc est unus mansus et unus curtilus et una vinea et unum pratum, quę in uno tenentur; terminanturque de uno latere via publica, de alio aqua Margarita currente, de una fronte terra Bernardi, de alia terra Jos
ceranni. Donamus etiam predicto loco et senioribus alium curtilum et alium mansum et aliam vineam, quę in uno tenentur, in loco ubi super Chalboum vocant; terminanturque de uno latere via publica, de alio latere et de una fronte terra Sancti Petri, a cirtio terra Gislebergię. Sed de vinea hic nominata medietatem donamus tantummodo. Donamus item unum curtilum et mansum et vineam quę in uno tenentur, in loco ubi in Marchisoyt vocant, horum itaque medietatem. Donamus et alias res nostras, quascunque in predictis locis vel terminis usque hodie habuimus, videlicet curtilos, edificia, vineę, vercherię, campi, prata, silvę, pomeria, pascuę, aquę aquarumque decursus, omnia super omnia, quesita et ad inquirenda. Omnia hęc cum omni integritate donamus ad locum Cluniacum, in elemosinam, pro anima Mainbodi, et pro animabus nostris; tali tenore, ut quandiu vixerimus, usumfructuarium ex his habeamus, et post nostrum obitum ad casam Dei et sanctorum apostolorum Petri et Pauli, hoc est ad Cluniacum, omnimodo deveniant. Sic etiam donamus et campum in loco ubi in Monte Betono vocant. Donamus et unam tiliam de terra in Loperoso, ubi Achediis vocant. Donamus et alium campum ubi ad Vernum Fronbergię vocant, quem adquisivit Mainbaldus et ego Anna, de Archinaldo. Omnia hęc prescripto tenore donamus ad locum Cluniacum, ita ut a rectoribus ejusdem loci in pace habeantur et possideantur in perpetuum.