Domno Aymardo, abbati, et fratribus de Cluniaco servientibus Deo et sancto Petro. Ego Tetradus et Aldo vendimus unam vineam et campos; quę res sitę [sunt] in pago Matisconensi, in fine Finiacensi, in villa Bionio. Ipsa vinea terminatur a mane via publica, a meridie de ipsa hereditate, a sero Sancti Philiberti, a circio Sancti Martini. Et in alio loco ubi dicunt La Verge, III campos. Unus campus terminatur a mane et a sero increpito, a meridie terra Sancti Petri; et alius campus terminatur a mane increpito, a meridie et a sero Sancti Petri, a circio Sancti Leodegarii; et tertius campus terminatur a mane et a meridie et a sero terra [Sancti] Petri. Hęc tradimus et transfundimus monachis Sancti Petri de Cluniaco, ut abeant et possideant ab hac die et deinceps, nullo contradicente. Si quis de heredibus vel posteris nostris istam venditionem contradicere et calumniari temptaverit, non valeat vendicare quod repetit, sed pro injusta calumpnia II libras de auro componat et donatio ista firma stabilisque permaneat, cum stipulatione subnixa. Actum Sitiaco villa publice. S. Tetradi et Aldonis, qui donationem istam fecerunt et per cartam firmari rogaverunt. S. Eldeleni. S. Letbaldi. S. Vualterii. S. Lantberti. S. Otgerii. S. Bosonis. S. Aldonis alterius. Ego Albertus, presbiter, scripsi, datavi die dominico, in mense martio, anno I regnante Lothario rege.