Ego Leotaldus, comes Matisconensis, considerans multitudinem peccatorum meorum, quę in hac miserabili vita vivendo contraxi, simulque tremendi judicis examen expavescens qui peccata hominum nequaquam impunita dimittit, decrevi, cum consilio uxoris meę et obtimatum meorum, de possessione mea quę mihi a Deo concessa est, aliquid donare pro salute animę meæ et filii mei Alberici matrisque meæ Etolanę, omniumque antecessorum meorum, eidem omnipotenti Deo et Cluniacensi cenobio, quod est consecratum in honore beatorum apostolorum Petri et Pauli, cui domnus abbas Aimardus preesse pariter ac prodesse videtur, mansum scilicet de Macionetio, quod situm est in agro Fusciacensi, juxta fluvium Sagone, cum tota sibi adjacente terra, culta et inculta, silvis, pratis, piscariis, aquis, molendinis, et cum uno servo, nomine Gunterio, filiisque ejus ac filiabus, et omnibus inantea adquirendis. Terminatur autem hęc terra ab oriente fluvio Sagonę, ab austro terra Sanctę Mariæ, et in reclavo rivo currente, nomine Met-Vesa, ab occidente terra de Capella et de ipso Macionedo usque ad terminum publicum, ab aquilone terra Francorum. Si quis itaque hanc meę devocionis helemosinam (quod absit!) ausus fuerit contradicere seu invadere vel calumpniari, divini anathematis excommunicatione feriatur, nisi cito culpam suam recognoscendo penituerit, et insuper pro perpera quam ingessit, libram auri componat, ac deinceps ab injusta invasione quiescat. Actum publice, apud Matisconum. Signum Leotaldi, comitis, et uxoris ejus Richeldę. S. Alberici, filii eorum, qui hoc donum laudando firmaverunt, et scribi jusserunt. S. Sigaldi. S. Wichardi. S. Rocleni. Data per manum Berardi, VIII idus mai, regnante Lothario Francorum rege.