Charta qua Teoricus levita dat monasterio Cluniacensi vineam in villa Hedias.
Notum fieri omnibus sub christiane fidei atque catholicæ norma degentibus, tam presentibus quam futuris, volo, quod ego Teoricus nomine ac levita, Dei amore compulsus, nos per evangelium ammonentis: «Thesaurizate vobis tesauros in celo, ubi nec erugo nec tinea demolitur,» necnon de animarum parentum nostrorum salute cogitans, scilicet Ratolfi et Elenæ ac Tetrici et omnium aliorum, dono Deo
et sanctis ejus apostolis Petro et Paulo ac Cluniensi monasterio vineam unam in pago Matisconensi, in agro Domciacensi sitam, in villa quę Hedias dicitur; terminatur de uno latere terra Sancti Petri, de alio latere terra Berengarii; ab una fronte via publica, de alia aqua currente. Infra has terminationes, vobis trado quicquid videor habere, quatinus post hunc diem, sopita alicujus altercatione, quod facere volueritis faciatis. Quod si forte aliquis hanc elemosinam maligno spiritu instigatus, quod minime futurum credo, destruere nisus fuerit, non vendicare quod repetit valeat, verum etiam judiciaria cogente potestate, unciam auri cui injuriam infert invitus persolvat, et elemosina hæc perhenniter inmutabilis consistat. Actum Besarniaco villa publice. S. Teorici, qui hanc elemosinam fecit et rogavit firmare. S. Evargi. S. Obbergi. S. Gonterii. S. Guilecmonis. S. Ottranni. Ego Leotardus scripsi die lune, mense martio, regnante Loterio rege.