Divina gratia miserante, statutum est de more, ut ex rebus mundialibus æterna possint promereri premia. Quapropter nos, in Dei nomine, Rotbertus atque Emena, donamus Deo et sanctis ejus apostolis Petro et Paulo, et monachis Cluniensibus, nostrum alodum qui est situs in comitatu Augustudunense, in vicaria Fracti Putei, in loco qui vocatur in Monticulo, cum omnibus appendiciis suis, campis, pratis, silvis, aquis, pascuis, quesitum et ad inquirendum, eo tenore ut usufructuario teneamus, et post nostrum discessum habeant in omnibus seniores Cluniacenses liberam potestatem faciendi quicquid voluerint. Similiter et in Volofonte donamus vineam unam quę adjacet comitatui Matisconensi, in vicaria de Buferias, quę terminat a mane terra Rotberti et alterius Rotberti, a medio die via publica, a sero terra Sancti Petri; simili modo ea ratione ut usufructuario teneamus dum vivimus; vineam etiam quam de Dominico conquesivimus. Si quis autem ad hęc calumpniam aliquam nisus fuerit infligere, contradictorem habeat sibi Deum omnipotentem et sanctos ejus apostolos; cogente vero judiciali censura, cui litem intulerit auri libram unam coactus persolvat, et hęc conscriptio a nobis libenti animo facta stabilis et inconcussa omni tempore permaneat, astipulatione subjuncta. Actum Cluniaco monasterio. S. Rotberti atque Emenę uxoris ejusdem, qui hanc donationem fieri et firmare rogaverunt. S. Leotbaldi presbiteri, Girbaldi, Armanni, Girberti, Mannonis, Ansalardi, Anselmi, Mainardi. Data in mense maio, ebdomada prima ejusdem mensis, anno imperii Lotharii regis, filii Ludovici regis, secundo, prima Olimpiadis. Eo tempore Rodulfus quidam scripsit.