Omnibus sub tytulo christianæ militiæ viventibus ejusdemque fidei censuram inconcusse servientibus, auxiliatrice misericordis Dei bonitate concessum est, ut sibimet consulentes profuturam sibi recompensationem et eternæ mercedis adquirant provisores effecti suæ salutis, dum student transitoria pro cælestibus et mansuris gaudiis commutare, domui Dei, sub auctoritate testamenti, sua porrigendo juste a se dudum possessa. Quapropter sub hac rationabilitatis congruentia ego Girbergis michimet ipsi prospiciens, licet supprema dies corporei discriminis a cunctis mortalibus inevitabilis et invisa jamjamque michi suo haustu imminens ex asse [exhauriens] corporis vires, fraude perniciosa perniciter advolans, statuo testamentum jure cessionis sanctuario Dei ex uno manso indominicato, qui adjacet comitatui Matisconensi, qui est situs in villa Petronna, in vicaria Baxiacense, ex omnibus partibus terminacionem accipiens de ipsius terra sanctuarii, ea conditione eosdem constituens heredes sub adtestatione cirografi, qui militare Deo noscuntur incartulati seu conscripti ad serviendum Deo sub pretextu monasticæ institutionis, ut quamdiu hoc in seculo subsistere potero vel advivere, liceat utere usufructuario, et post hæc deinceps cum vita excessero, cum omnibus pertinentiis et adjacensiis suis: hoc est campis, silvis, pratis, pascuis, molendinis, aquis aquarumque decursibus, quesitum et ad inquirendum, ex omnibus quicquid facere eis placuerit faciant, tantum memores sint animæ meæ. Si quis vero contradictor extiterit huic donationi, contradictorem regni cælestis habeat Deum omnipotentem et beatum Petrum apostolum. Hanc autem conscriptionem donationis meæ manumissione mea corroboratam et inconcusse firmatam a manumissoribus suis Domino Deo omnipotenti et beato Petro apostolo offero, astipulatione adnexa. S. Gerburgæ, qui hanc conscriptionem non tantum fieri, sed etiam firmare rogavit. S. Ramaldi. S. Leotaldi. S. Anscherii. S. Stephani. S. Hemardi. S. Teutberti. S. Rotberti. S. Fulqualdi. S. Adalberti. Hæc descriptio facta est a Rodulfo, anno Dominicæ incarnationis DCCCCLVI, anno tercio imperii Lotharii regis, filii Ludovici imperatoris.