In nomine Domini nostri Jesu Christi. Notum sit omnibus hominibus qualiter residente domno archiepiscopo Widone Vesuntica civitate sancta synodo, venit in conspectu ejus quidam archidiaconus, nomine Girfredus, nepos scilicet Girfredi antecessoris sui, humiliter deprecans ut ei aliquid ex rebus Sancti Stephani, quas isdem supramemoratus avunculus suus archiepiscopus pro remedio anime sue Sancto Stephano condonavit, in prestarie donatione concederet; scilicet vineam unam in comitatu Cabilonense, in villa que dicitur Catuico. Et habet terminaciones ipsa vinea de uno latere via publica, et de alio Warulfo et Alexandro, et ex tertio fronte semita una, et ex quarto strata publica. Cujus petitionem supramemoratus Vuido archiepiscopus consentiente, simulque omnibus canonicis, benigne suscepit, atque eandem supradictam vineam in prestaria ei concessit tempore vite sue, et post decessum suum uni nepoti suo, nomine Gotzeranno, ut eam habeant adque teneant omnibus diebus vite sue usufructuario. Econtra dedit Girfredus Sancto Stephano in adquisicione alteram vineam in comitatu Cabilonensi, in villa nomine Sarciaco, eo scilicet tenore ut omni revolutione anni persolvat in censum de supradicta vinea, in festivitate sancti Stephani, XII denarios. Quod si aliquando neglegens inde extiterit, in duplum componat et non perdat. Et ut hec prestaria firma stabilisque permaneat, ego ipse Vuido archiepiscopus manu propria eam firmavi et ut firmaretur a fratribus rogavi. S. Widonis archiepiscopi. S. Tinquardi archidiaconi. S. Gonfredi archidiaconi. S. Helganni decani. S. Hittoni canonici. S. Otdoni canonici. S. Dudini levita. S. Ingelrigei canonici. S. Aluilfus. S. Benigni canonici. S. Duranni canonici. S. Otberti levita. S. Alcheri. S. Eurardi canonici. S. Rotberti canonici. S. Warini canonici. S. Johannis canonici. S. Berengerii canonici. S. Alberti canonici. Ego, in Dei nomine, Frodo levita, vice Roberti cancellarii, scripsi et datavi pridie idus maias, die veneris, regnante vicesimo quinto anno Conrado rege feliciter.