Charta permutationis terrarum in villa Seia inter monachos Cluniacenses et Davidem presbyterum.
Placuit atque convenit inter Johannem et ceteros monachos Sancti Petri de Cluniaco, et inter David, presbiterum, terrulas quasdam inter se commutare. In primis donavit David, presbiter, ad Cluniacum vineam quę est sita in pago Matisconensi, in agro Laisiaco, in villa Seia; terminaturque a tribus partibus terra Sancti Petri, a cirtio Sanctę Marię. Infra istas terminationes, dedit totum David ad Sanctum Petrum de Cluniaco, ut rectores ejusdem loci faciant quod melius voluerint, nullo contradicente. Si quis contradixerit, unam libram de auro componat et carta ista firma et stabilis permaneat. S. David, presbiteri, qui istud concamium fecit et firmare rogavit. S. Adalbodi et reliquorum testium quorum supra.