Charta qua Walo et uxor ejus Teza monasterio Cluniacensi vendunt Vineam et dant Campum in villa Carsiniaco.
Sacrosanctę ęcclesię Cluniensis cęnobii, abbati scilicet donno Maiolo sibique subjectis monachis. Ego Walo et uxor Teza vendimus unam vineam quę est sita in pago Matisconensi, in villa Carsiniaco, in fine Ciciacense; et terminatur a mane terra Wagonis, a sero Sancti Jangulfi, a meridie via publica, a certio Heldini et Mainfredi, et accipimus ab eis precium solidos XIII. In eodem namque loco donamus unum campum, qui terminatur a mane terra Airici, a meridie Sancti Petri, a sero via publica, a certio terra Sancti Petri. Infra superiores terminos, vendimus totum ab integro pro suprascripto precio, infra istos donamus totum pro animabus nostris; et faciant ipsius loci seniores in omnibus quicquid voluerint. Qui autem contradixerit, auri uncias III componat, et inantea hęc carta firma et stabilis permaneat, stipulatione subnixa. Actum Tornocio. S. Walonis et uxoris ejus Tezę, qui fieri et firmare rogaverunt. S. Fulcherii. S. Azonis. S. Laurentii. S. Bertranni. Elmerardus scripsit mense martii, die sabbati, anno XVI Lotharii regis.