Redemptor humani generis previdens salutem suorum fidelium, per semet ipsum protestatus est, ita inquiens: «Facite vobis amicos de Mammona iniquitatis, ut cum defeceritis recipiant vos in ęterna tabernacula.» Quapropter ego, in Dei nomine, Hugo et uxor mea Ailmodis et filius noster Stephanus donamus Deo et sanctis apostolis ejus Petro et Paulo, et ad locum Cluniacum, cui preest donnus Maiolus abba, aliquid ex rebus nostris, quę sunt sitę in pago Augustidunense, in villa Enziaco, super fluvium Arcuntiam: hoc est mansum indominicatum, cum ęcclesia quę est dicata in honore beati Martini, et capellam in honore sanctę Marię, cum omnibus eorum pertinentiis, coloniis scilicet, campis, vineis, pratis, silvis, vi[r]cariis, aquis aquarumque decursibus, molendinis, pascuis, exitibus et regressibus, cultis et incultis, quesitum et ad inquirendum, totum ad integrum, cum omni superposito, servos etiam et ancillas, cum infantibus eorum tradimus in perpetuum servituros. Donamus etiam terram quam habemus in villa Balgiaco, totam ad integrum usque ad inquirendum. Has ergo res denominatas donamus ad jam dictum locum pro remedio animarum nostrarum, et pro emendatione castelli quod fuit ad Ambertam, pro precaria etiam quam modo de Ambariaco villa ab eis accipimus; et faciant de his rebus a die presenti et in reliquo futuro tempore quicquid facere voluerint in omnibus. Si quis autem, nos ipsi, aut ulla intromissa persona, contra hanc donationem venire vel calumpniare temptaverit, iram Dei omnipotentis et sanctorum apostolorum incurrat, cum diabolo etiam retrudatur in baratro dampnationis, nisi ad emendationem venerit; secundum vero legem mundanam, potestate coactus, auri libras X persolvat, et inantea firma et stabilis permaneat, stipulatione subnixa. Actum Saviniaco publice. S. Hugonis et uxoris ejus Ailmodis et Stephani, filii eorum, qui donaverunt et ipsi firmaverunt. S. Otgerii. S. Leotardi. S. Aymonis. S. Adalardi. S. Humberti, presbiteri. S. Duranni, presbiteri. S. Duranni. S. Otberti. S. Gausmari. S. Arnaldi. S. Narduini. S. Willinchi. S. Archodi. S. Conforti. Data mense augusto, anno XXX Cunrhadi regis. Rothardus, ad vicem cancellarii, recognovit.