Sacrosanctę Dei ęcclesię quę est constructa in honore sanctę Marię et sancti Petri in Cluniaco. Ego, in Dei nomine, Desiderius, presbiter, et Gosmarus, ex amore et benivolentia nostra et pro remedio animę Barnoldi, sacerdotis, donamus predictę ęcclesie Dei Cluniacensi, ad Sanctam Mariam et ad Sanctum Petrum, mansum unum cum curtilo et vinea vel torculari atque cellario, cum nemore etiam juris nostri; qui videlicet mansus cum suis appendiciis est in pago Viennensi, in agro Casiacensi, in villa Bracosco. Qui mansus habet terminationes istas: de uno latere terra Sancti Petri, de alio latere simul cum recalco terra infantum Gemmonis et Barnoldi, in superiore fronte via antiqua, in supteriore fronte terra Barnoldi et Martini. Infra hos fines et terminationes, una cum arboribus et exitibus, totum et sub integro donamus jam dictę ęcclesię Dei Cluniacensi, ea tamen ratione, ut quamdiu nos, hoc est Desiderius et Gosmarus, advixerimus, usum fructuarium possideamus, et per annos singulos dabimus sex modios de musto in vestituram, et cum alter e nobis supervixerit alteri, qui superstes fuerit hunc ipsum fructuarium usum solus possidebit. Post mortem vero amborum, ad Cluniacensem ęcclesiam, sicut hodie decernimus et vovemus, in perpetuum pertinebit. Quod si nos ipsi, vel aliquis de ęredibus nostris aut ullus omnino hominum extiterit aliquando, qui donationi huic nostrę contraire eamque dissipare velit, nichil ad hoc prevaleat, nichilque perficere possit, insuper componat tantum et aliud tantum quantum donatio ista valet nunc, vel eo tempore meliorata valuerit, et omni tempore firma stabilisque permaneat, omni stipulatione subnixa. Ego Desiderius, presbiter, et Josmarus donationem istam fieri firmarique rogavimus. Ego Johannes, presbiter, dictavi et scripsi eam, in mense decenbri, VI feria, anno XXX^o VII^o regnante Gonrado rege. S. Fanuel. S. Ondradi. S. Martini. S. Andreę. S. Ricardi. S. Arnoldi. S. Warnerii. Ego Bernoldus, presbiter, subscripsi.