Dominus ac Salvator nostri salutem humani generis congaudens, et semper in omnibus previdens, hoc munus et genus remedii contulit sua gratuita pietate, ut ex rebus caducis atque infimis mansura et sine fine constans vita possit absque dubio adquiri. Quapropter ego Agbertus hanc vitam immarcessibilem cupiens totis viribus promereri, dono Deo et sanctis apostolis ejus Petro et Paulo, Cluniensis cenobii, cui domnus Maiolus abbas presse videtur, aliquid ex rebus meis, quę sunt site in pago Cabilonensi, in vicaria Sancti Hisidori, in villa Roserias: hoc est mansum indominicatum; qui mansus habet in circuitu sui vineas et campos ad se pertinentes, et terminat a mane via publica, a medio die terra Bodoni, a sero Rocleni, a cercio Sancti Petri. Infra istas terminaciones, cum omnibus suis appendiciis, vineis, campis, quesitum et ad inquirendum, cultum et incultum, totum ad integrum dono Deo et jam dictis apostolis, et ad prefatum locum, pro remedio anime meæ et matris meæ Aye, necnon Ayrici, qui hanc terram conquesivit, ut Ipse qui futurus est judex omnium, nobis blandus et misericors in suo judicio appareat. Et hæc omnia denominata eo tenore dono ut, quandiu ego advixero, teneam et possideam, et singulis annis in vestitura dimidium modium de vino persolvam. Si quis autem hanc donationem a me libentissime factam calumniare vel sindere voluerit, primitus iram Dei omnipotentis incurrat, sanctorumque apostolorum quorum res invadere non est reveritus, et nisi ab hac sua stultitia emendaverit, in inferni baratro cum diabolo se sciat esse dampnandum, deinde coactus publico judicio, auri libras V persolvat, et inantea hæc donatio seu carta omni tempore firma et stabilis permaneat, stipulatione subnixa. Actum Cluniaco monasterio. S. Acberti, qui fieri et firmare rogavit. S. Lanberti, comitis. S. Rodberti, vicecomitis. S. Oddoni, qui consensit. S. Gisleberti. S. Girfredi. S. Oddoni. S. Arlei. S. Alaldi. S. Lanberti. S. Cristiani. S. Aldoardi. S. Arnaldi. S. Algeri, Guunterii. S. Ingelberti. S. Salomonis, Johannis. S. Adoardi. Data mense aprilio, anno XX Hlotarii regis. Rothardus, inutilis monachus, ad vicem cancellarii recognovit.