Dominus ac redemptor humani generis desiderans salutem fidelium suorum, per semet ipsum monet, dicens: «Date elemosinam et omnia munda sunt vobis.» Unde ego Sievertus et uxor mea Landrada, hanc vocem adimplere cupientes, donamus Deo et sanctis apostolis ejus Petro et Paulo, ad locum cenobii Cluniensis, aliquid ex rebus nostris, quę sunt site in pago Matisconensi, in agro Ainaco, in villa Flagiaco, in loco quem Casalem vocant: hoc est vinea et campum simul tenente, que terminant a mane via publica, a medio die terra Sancti Vincentii, a sero de ipsa hereditate, a circio terra Grimaldi. Infra istas terminationes, quicquid inibi visi sumus habere, totum ad integrum donamus, pro remedio animarum nostrarum et parentum nostrorum, ut nobis omnibus in commune proficiat; et eo tenore hoc facimus ut, quandiu ego solus vixero, teneam et possideam, et si ad locum ipsum voluero venire, vivus aut mortuus, pro hoc facto me recipiant, et in vestitura omni anno duos sextarios de vino persolvam. Si quis autem hanc donationem calumpniare aut vim inferre temptaverit, non valeat vindicare quod repetit, sed vi coactus, auri libram unam persolvat; et inantea firma et stabilis permaneat, stipulatione subnixa. Actum Lordono publice. S. Sieverti et Landrade et filii eorum Malguini, qui donum fecerunt et firmari rogaverunt. S. Dodoni. S. Duranni. S. Arlei. S. Oddonis. S. Ardradi, Vuidonis. S. Fulcaldi, Fulcardi, Iberti. Data per manum Rotardi, anno vigesimo V Lottharii regis.