Dominus hac salvator noster fideles suos per semet ipsum dignatus est ammonere, dicens: «Facite vobis amicos de Mamona iniquitatis, ut cum defeceritis, recipiant vos in ęterna tabernacula»; et item Scriptura dicit: «Divitiæ viri redemptio animæ ejus.» Quapropter ego Leutza et filii mei, scilicet Aschericus et Boso, atque Constantia, uxor Ascherici, donamus Deo et sanctis apostolis ejus Petro et Paulo et monachis Cluniensis monasterii, ubi domnus Maiolus abbas preesse videtur, pro remedio animæ senioris mei Josleni et pro anima mea, pro animabus quoque filiorum meorum Ascherici et Bosoni, necnon et pro Constantia, uxore Ascherici, filii mei, et pro omnibus parentibus nostris, vivis et defunctis, pro omnibus scilicet christianis vivis atque defunctis: hoc est mansum unum qui est situs in pago Lugdunense, in agro Strabiacense, in villa quæ vocatur Asnerias; totum et integrum cedimus beatis apostolis Petro et Paulo et monachis Cluniensis cœnobii Deo militantibus, ut post hac die jam prenominati monachi usque inexquisitum teneant et possideant, id est licentiam habeant ut faciant quicquid facere voluerint, scilicet abendi, vendendi, donandi, seu liceat commutandi. Et si nosmet ipsi, aut aliqua admissa persona contra donationem istam aliquam calumnia inferre voluerit, primitus iram Dei incurrat et ab eclesia genitrici ejus, necnon et ab illa quę Dominus dedit apostolis suis Petro et Paulo sit separatus, a consortio omnium quoque bonorum sit dejectus, et nisi ad emendationem venerit, participatio ejus sit cum Dathan et Abiron. Postea autem donatio ista firma et stabilis permaneat, cum stipulatione subnixa. S. Leutze. S. Ascherici, filii ejus. S. Bosoni, filii ejus. S. Constantiæ. S. Amalfredi, presbiteri. S. Ricardi. S. Heldebranni. S. Arnaldi. S. Teudoni. Data per manu Duranni, monachi, die veneris kalendis augustis, anno ab incarnatione Domini nostri Jesu Christi DCCCC^mo LXX^mo VIIII^no, indictione VII^a, regnante rege Chuonrado in Gallia.