Notitia donationis in Burgolio a Girberga et duobus filiis ejus monasterio Cluniacensi factæ.
Girberga habuit tres filios quibus dereliquit suam hereditatem. Duo eorum, cum consensu matris, post discessum eorum et matris, partem suę hereditatis dederunt Sancto Petro Cluniensi. Tertius, qui vocabatur Andreas, secessit in pago Nevernensi, et quia extranea erat ei pars ejusdem hereditatis quę ei jure evenerat, commutavit eam cum Odilardo, et accepit ab eo scamium in predicto Nivernensi pago, et dedit ei hereditatem suam quam habebat in Burgolio; qui Odilardus dereliquit suę filię omnem eandem jam dictam hereditatem. Quę jam dicta Emma quandam puellam, nomine Letburgam, patris quoque et matris adjutorio orbatam, miseria ejusdem puellulę paupertatis commota, enutrivit et erudivit, deinde tradidit eam in conjugio cuidam viro, nomine Walterio, et concessit predictę puellulę sępedictam hereditatem, ea ratione ut, quamdiu vixerit, teneat et possideat; post discessum vero ejus, ad filium ejusdem matronę Emmę redeat, Joscerannum nomine, nullo alio herede impediente.