Charta qua Adalgardis dat monasterio Cluniacensi vineam in villa Dumbinas.
In Christi nomine. Dominis meis monachis Cluniensibus, quibus preest donnus abba Maiolus. Ego Adalgardis dono, pro remedio animę meę et omnium parentum meorum, aliquid de rebus meis quę sunt sitę in pago Matisconense, in agro Maciacense, in villa Dunbinas: hoc est unam vineam quę terminatur de tribus partibus de ipsa hereditate, a meridie terra Sancti Petri, et habet in longum perticas XX, in una fronte XII, in alia XI; et faciant ipsi seniores mei quicquid voluerint. Qui autem contradicere voluerit, auri libras II persolvat, et inantea firma et stabilis permaneat, stipulatione subnixa. Actum Lordono castello. S. Adalgardis, quę fieri et firmare rogavit. S. Clementis. S. Richerii. S. Anserici. S. Wandalfredi. S. Ainardi, clerici. S. Selivrandi. S. Malberti. Data per manum Eldradi, die lunis, mense novembri, anno XXVIII Lotharii regis.