Divina pietate, [et cetera.] Nos elemosinarii, in Dei nomine, Arluini, senioris nostri, Iterius, archipresbiter, Ermengisius, presbiter, Amblardus, donamus pro anima ejus, sicut ore suo ipse jussit nobis, æcclesiam quę est in honore sanctę Dei genitricis Marię dicata, in villa Arteuno sita, cum ipsa villa et cum omnibus appenditiis suis, vineis, campis, pratis et silve increpitum, quod est juxta Puteum, et pascuis et aquis, cum omni integritate quę ad eandem villam aspicere videntur; donamus, vice senioris nostri Arluini, Deo omnipotenti et sanctis apostolis ejus Petro et Paulo, ad locum Cluniacum, tam pro anima ejus quam pro animabus omnium christianorum. Sunt ipse res sitę in comitatu Forense; et in pago Matisconensi, villam, nomine Exartels, cum ecclesia quę est in honore sancti Mauricii consecrata, cum omni integritate quę ad ecclesiam et villam aspicere videntur; et in villa Bociaco colonia una, ubi Constantinus manet. Testes: Iterius, archipresbiter, Ermengisus, Amblardus, Umbertus, Rotlannus, Rodulfus. Teotmarus scripsit anno XXVIII regnante Hlothario rege.