In nomine sanctæ et individuæ Trinitatis. Lotharius, divina annuente clementia, Francorum rex. Notum sit omnibus sanctæ æcclesiæ fidelibus, tam futuris quam presentibus, qualiter per deprecationem dilectissimæ conjugis nostræ Hemmæ, quatuor mansos in villa Pumeriaca, quos Judita, Sancti Marcelli abbatissa, cuidam fideli nostro, nomine Wigero, ejusque conjugi Willicomæ, in nostri nostrorumque fidelium præsentia appreciaverat, illisque perpetualiter jure hereditario vendiderat, ob testimonium credulitatis insigniri mandaremus anulo nostræ ditionis, quod et fecimus; eo tenore ut, quoad vixerit predictus Wigerius uxorque ejus Willicoma vel quilibet suorum heredum, teneant, possideant, vel quicquid exinde facere voluerint faciant, absque ullius controversia, stipulatione subnixa. Actum Compendio palatio, regnante domno et glorioso rege Hlothario anno XXX. (Monogramme) Ego Arnulfus, notarius, ad vicem domni Adalberonis, archiepiscopi, summi cancellarii, subscripsi.