Dominus ac redemptor humani generis desiderans salutem fidelium suorum ammonet nos, dicens: «Facite vobis amicos de Mammona iniquitatis, ut cum defeceritis recipiant in ęterna tabernacula.» Qua ammonitione ego Teodericus, levita, ammonitus, dono Deo et sanctis apostolis Petro et Paulo, et ad locum Cluniacum, ubi preesse videtur donnus et abba Maiolus, quas[dam] res meas, quę sunt sitę in pago Matisconense, in agro Prisciacense, in villa Chedias, pro remedio animę meę, et patris ac matris meę, et omnium parentum meorum, necnon omnium fidelium defunctorum: hoc est in primis unum mansum cum vinea, qui terminatur undique terra Sancti Petri; iterum in eadem villa alium mansum in quo residet Arrecius: et terminatur in tribus partibus terra Sancti Petri, a sero via publica. Itemque dono alium mansum, in quo residet Aldo, et terminatur a mane terra Sancti Petri, a tribus partibus via publica; et terram quę vocatur in Monte Botono, et aliam terram quę vocatur Subter Cras, et unam vineam quę terminatur a mane vinea Berengarii, a meridie via publica, a sero terra Sancti Petri, a cirtio rivo currente; in Grandi Monte vero terras et silvas, et de mancipiis: Arecium cum uxore sua et infantibus suis, Aldonem cum uxore sua et infantibus suis, Arembertum atque Otgerium. Has res et hęc mancipia dono ad prefatum locum, ut supra taxavimus, cum omni integritate et omni libertate; et faciant monachi Sancti Petri quicquid voluerint, nemine contradicente. Qui autem contradicere vel violare hanc donationem temptaverit, iram Dei omnipotentis omniumque sanctorum incurrat, nisi emendaverit, coactusque judiciaria potestate, cui litem intulerit auri libras tres persolvat, et postea firma et stabilis permaneat, stipulatione subnixa. S. Teoderici, levitę, qui fieri et firmare rogavit. S. Odolgerii. S. Girbaldi. S. Antelmi. S. Gunterii, sacerdotis. S. Uberti. S. Rotberti. S. Arlei. S. Rotberti. Data per manum Aldebaldi, regnante Lothario rege anno XXX.