Dominus ac redemptor noster suorum previdens salutem fidelium, protestatur, dicens: «Date elemosinam, et omnia munda sunt vobis.» Quapropter ego Guadrannus dono Deo et sanctis apostolis ejus Petro et Paulo aliquid ex rebus meis quę sunt sitę in pago Matisconense, in agro Irniacense, in villa Misiaco: videlicet in primis unum curtilum cum superposito et cum omnibus appenditiis suis, campis, pratis, silvis, aquis, totum ab integro, usque ad inquirendum, qui terminatur de duabus partibus terra infantum Gisonis, de tertia parte terra Cadiosa, de quarta parte Guanda volvente. Et dono in villa Mont unam vineam, quę terminatur de tribus partibus terra infantum Otberti, de quarta parte terra infantum Botonis. Et dono alium campum ubi ad Fontenilis dicitur. Istas res denominatas dono cum omni integritate ad prefatum locum Cluniacum, quem donnus abba Maiolus regere videtur, eo tenore ut quandiu vixero teneam vel possideam, et post meum discessum ad Sanctum Petrum perveniant. Hęc donatio firma et stabilis permaneat, stipulatione subnixa. Actum Besorniaco. S. Guadranni, qui fieri et firmare rogavit. S. uxoris ejus Garlendis, quæ libenti animo consensit. S. Rothardi. S. Adalgisi. S. Johannis. S. Ragenbedi. S. Aremberti. Data per manum Girbaldi, die martis, mense junio, regnante Hugono rege. Ebrardus scripsit.