In Christi nomine. Noverint cuncti fideles quod ego, in Dei nomine, Fulcho sacerdos dono Deo et sanctis apostolis Petro et Paulo et ad locum Cluniacum aliquid de rebus meis quę sunt in pago Maticensi, in villa Marchesolio, in agro Fabriacensi, hoc est curtilum indominicatum ubi Wido manet, in ipso curtilo raisiam unam de vinea, quę habet in longum perticas XXXVI, et terminatur a mane terra Aymonis, de alio latere fossa, de tercia parte via publica, de quarta Fulconis. In alia parte, in ipso curtilo, aliam raisiam de vinea quam de Hugone conquisivi. In ipso curtilo dono aliam vineam quam de Deodato fratre meo conquisivi, et dono in ipso loco campum unum qui ad Vinealem vocatur, et terminatur de tribus partibus via publica, de quarta Fulconis. In ipso curtilo dono alodium quem Eldegardis et Rostagnus conquisierunt de Girbaldo, et unam vineam quam conquisivit Rostagnus de Ledgerio, filio Gerbaldi. In ipso curtilo do vineam quam Bernardus plantavit; et dono in alio loco curtilum cum vinea, quem de Girbaldo conquisivi, et ad Spinetam vocatur; et dono in alio loco medietatem de campo qui ad Casam vocatur. Totum ad integrum dono hęc omnia post meum discessum, pro anima mea et animabus omnium parentum meorum. S. Fulconis sacerdotis. S. Rostagni. S. Raimbaldi. Actum Cluniaci, regnante Hugone. In vestitura do dimidium modium de vino.