Notitia guerpicionis quam domnus Helmeradus, Regensis episcopus, fecit in villa Valentiolensi. Venit prefatus pontifex in ecclesiam ejusdem ville, ante preciosa pignora sanctorum que in imagine Sancti Petri continentur, et vuerpivit in presentia domni Varnerii, Cluniacensis prepositi, aliorumque fratrum qui cum eo aderant, omnem querelam quam habebat adversum eos de decimis eorum proprii laboris ac omnis possessionis, et de omni terra quam requirebat, tam in ipsa villa quam alibi, nomine predicte ecclesie dotis. Hæc igitur omnia cum aliis consuetudinibus non rectis non solum dimisit ac vuerpivit, sed etiam si quid ex hoc ad suam rectitudinem pertinebat, Deo et Sancto Petro Cluniacensique loco et ejus habitatoribus totum libentissime concessit, sub tali scilicet anathematis conditione, ut nullus ex successoribus suis hoc ulterius audeat repetere; sed hec descriptionis vuerpitio firmum et inconvulsum obtineat in perpetuum vigorem, absque ullius contradictione. S. domni Almeradi episcopi, qui hanc donationis vel vuerpicionis fieri ac firmari precepit. S. Poncii. S. Unberti. S. Nectardi. S. Raimbaldi. S. Martini. Data per manus Vuarnerii.