Charta qua Odilo, abbas Cluniacensis, dat in precaria Rocleno et filio ejusdem nominis, archidiacono, vineam in villa Aquarias.
In Christi nomine. Jam rebus sanctę matris æcclesiæ multiplici fidelium quaquaversum largitate diffusa, iste mos inolevit et usu communi pro lege habetur, ut non tantummodo in clericali, set etiam in laicali habitu degentibus, a proprio sacello æcclesiæ aliquid subtractum ipsis sub censu prorogetur, salva ratione ut eadem demum meliorata restituant. Unde noverint tam presentes quam futuri, quod ego Odilo, Cluniensium abba, cum consensu fratrum, dono cuidam viro Rocleno et filio ejus, ipso vocabulo insignito, archidiaconatus officium administranti, quandam vineam nostram subtus castrum Branciduno sitam, quam Durannus tempore vitæ suę nobis inprecavit possidendam. Hanc itaque vineam, post discessum Duranni, jam dictis petitoribus sub censu possidendam tradimus, ut quandiu ipsi duo advixerint, teneant et singulis annis, festivitate sancti Petri, V solidos persolvant. Est autem hæc vinea in villa Aquarias. Hanc precariam firmando manu nostra roboravimus, et fratribus nostris, ut identidem agerent, tradidimus. Domnus Odilo, humilis abba, firmavit. S. Viviani, prepositi. S. Achedei. S. Witberti. S. Teoderici et multorum aliorum. Data mense augusto, regnante Hugone rege anno VII.