Charta qua Arloenus et uxor ejus Sadra dant monasterio Cluniacensi ecclesiam sancti Dionysii in villa Crusilicas.
Divina pietate legisque auctoritate sancitum est, ut de terrenis rebus celestia adquirere debeamus. Quapropter nos quidem Arloenus et uxor mea Sadra donamus Domino Deo sanctisque ejus apostolis Petro et Paulo et ad locum Cluniacum, ubi dunnus Odilo abba preesse videtur, ęcclesiam quę est in pago Lugdunense, in honore beati Dionisii dedicatam, in villa quę dicitur Crusilicas, et quicquid nobis de ipsa ęcclesia legibus advenit vel advenire debet, omnia in omnibus ad jam dictum locum perveniant. Qui autem contradixerit, anathema sit, insuper auri uncias coactus componat X, et hęc donatio firma et stabilis permaneat, cum stipulatione subnixa. S. Arloeni et uxoris ejus Sadzyę, qui fieri et firmare fecerunt. S. Sinnari. S. Warnaldi. S. Duranni. S. Adalardi presbiteri. S. Giraldi, sacerdotis eunuci. S. Arloeni. Actum in pago Lugdunensi, III idus novembris, regnante Rotdulfo rege.