In nomine Verbi incarnati. Noverint fideles cuncti, quod ego Rodulfus dono Deo et sanctis apostolis ejus Petro et Paulo, et ad locum Cluniacum, ubi prodesse magis quam preesse videtur domnus ac reverentissimus Odilo abbas, ex rebus paterno michi adjectis, unum videlicet mansum in territurio Gratianopolitanensi, in villa vocabulo Moriana, cum omnibus que ad ipsum aspicere videntur, totum ad integrum, quesitum et ad inquirendum, quem ego teneo. Hanc igitur cartam fatio pro anime meæ, anime quoque patris mei ac matris mee, omniumque parentorum meorum remedio, ut omnium Dominus concedat perpetualiter nos gaudere in suo regno. S. Rodulfi, qui hanc cartam fieri et firmare rogavit.