Previdens omnipotens Deus casus humane fragilitatis, inter cetera carismatum suarum dona que fidelibus concessit, hoc precipue et speciale illis in mandatis dedit, ut de terrenis et transitoriis possent sibi cælestia et eterna mercari. Quapropter ego, in Dei nomine, Alindrada et filii mei Gauzerannus et Ebrardus, pro anima filii mei Umberti, dono Domino Deo et sanctis apostolis ejus Petro et Paulo, ad locum Cluniaco, ubi preesse videtur domnus et reverentissimus abbas Odilo, hoc est unum curtilum situm in pago Matisconense, in villa Soliniaco, cum uno franco, nomine Martino. Est autem ipse curtilus terminatus a mane terra Sancti Petri, a medio die via publica, a cercio terra Adaltrudis. Facio autem hanc donationem in tali conventu, ut ab hac die faciant monachi de Cluniaco quicquid facere voluerint. Si quis autem huic nostre donacioni calumpniare voluerit, omnibus maledictionibus Mosayce legis teneatur astrictus, et cum Datan et Abiron cremetur eternis ignibus. S. Alindradę. S. Joceranni, filii ejus. S. Ebrardi, filii ejus. S. Odilę. S. Letpranni. S. Duranni. S. Martini. S. Christiani. S. Berardi. Letaldus et Ramnulfus de hac donatione fidem fecerunt, stabilis firmaque permaneat.