Dum in hujus seculi laboriosa vivitur peregrinatione, interim cum licet summopere cavendum est ut de rebus transitoriis valeamus adquirere celestibus regnis, ut scriptum est: «Divitie viri redemptio anime ejus.» Quapropter nos, in Dei nomine, Agathæ et Adaltrudis quasdam res juris illius [viri], nomine Gauceranni, donamus Deo et sanctis apostolis ejus, videlicet Petro et Paulo, pro remedium anime ejusdem et pro anima patris et matris ejus et pro omnibus parentibus suis; que [res] sunt site in pago Matisconense, in villa que nominatur Veriolas: hoc sunt vineas et una condamina que nominant Rotunda, totum et integrum, quantum ipse habere videtur; in tale conventu ut easdem res jam dictas non liceat neminem dare, sed in proprio usu teneant et possideant rectores Cluniacensi monasterii, ubi domnus abba Odilo videtur magis prodesse quam preesse; et ut prelibatas res jure perpetuo teneant et possideant pro ipsisdem ac per dictos apostolos ejus familiariter interpellent. Si quis vero, quod evenire non estimamus, aliquis ex heredibus ejus aut propinquis, seu aliqua obposita persona contra hanc donationem aliquam litem commovere temptaverit, primum iram Dei incurrat nisi cito resipuerit, fiatque pars ejus cum Dathan et Abiron in inferno; secundum vero mundalem legem, his quibus litem intulerit XV libras auri, cogente judiciaria potestate, coactus persolvat; et conatus illius nullum consequatur effectum, sed hujus donationis firmitas inconvulsa permaneat. S. Agathe et Adaltrudis, qui hanc donationem fieri firmarique rogaverunt. S. Artaldi. S. Vualterii. S. Leotaldi. S. Ugo. S. Wilelmi. S. Livoni. S. Gaufredi. S. Lanberti.