Charta qua Roclenus dat monasterio Cluniacensi res suas in villa Burziaco et in Perroilo.
Cunctis sanum sapientibus certum est, ut hii qui bona temporalia possident, ex ipsis studeant æterna premia adquirere, dicente hoc Domino: «Facite vobis amicos de Mamona iniquitatis, ut cum defeceritis recipiant vos in eternis tabernaculis.» Quam rem perpendens, ego Roclenus cedo Domino Deo sanctisque ejus apostolis Petro et Paulo, et ad locum Cluniacum, ubi preest domnus Odilo abba, omnia que mihi jure hereditario obveniunt in villa Burziaco, et in Perroilo terciam partem unius curtilis quem Stephanus tenet; ut ab hodierna die predicti
loci habitatores teneant et possideant, sine ullo contradicente. Signum Raucleni, qui hanc cartam fieri rogavit. S. Aymoni. S. Alarici. S. Fredeberti. S. Raimberti. S. Higgerii.
(Au dos:) Rocleni, Burciaco.