Charta qua Roclenus Deo et monasterio Cluniacensi seipsum et res suas servosque in villis Cabannas Burgziacoque et in Perroilo offert.
Quisquis ad supernam patriam ire desiderat, omnigenis nisibus debet hyma relinquere, et omni sagacitate bonis operibus insistere. Unde ego Roclenus, omnipotentem Deum placatum habere desiderans, et in ejus obsequiis continuatim permanere exoptans, non solum me, sed etiam aliqua jure hereditario mihi concessa, eidem Domino Deo offero, sanctisque ejus apostolis Petro et Paulo, et ad locum Cluniacum, sub regimine dunni Odilonis abbatis constitutum. Est autem unus mansus in villa Cabannas situs, quem dono cum omnibus ad eum pertinentibus, videlicet silvis et vineis, aquis aquarumque decursibus. Et in villa Burgziaco dono unum curtile cum servo qui eum incolit, et ejus infantibus, qui servus vocatur Tigerius; et aliud curtile cum omnibus ad eum pertinentibus positum in Perroilo. Dono autem et servos Nogerium et Constabum (sic) uxoremque ac infantes. Dono autem hęc pro redemptione animę meę omniumque parentum meorum. Ego Roclerus hanc cartam propriis manibus firmo, cujus rogatu facta et conscripta est, aliisque firmandam trado. S. Aymonis. S. Alarici. S. Fredeberti. S. Raimberti. S. Higerii.