Dum adhuc in hoc corpore sumus et in hac misera vita conversamur, totis viribus nobis est elaborandum quatinus de collatis hac concessis divinitus bonis temporalibus satagamus adquirere nobis amicos et advocatos, ut pro transitoriis et quandoque perituris rebus, post depositionem hujus corporis, ab ipsis mereamur recipi in æternis mansionibus. Sic enim Deus et Dominus noster in quodam sui sancti euvangelii loco nos ammonere dignatus est, ita dicens: «Facite vobis amicos de Mammona iniquitatis, ut cum defeceritis recipiant [vos] in æterna tabernacula.» Quapropter ego Hugo, divinum preceptum audiens, multitudinemque meorum peccaminum recognoscens, et exinde dominatori omnium satisfacere cupiens, dono ex mea hereditate ejus sanctis apostolis Petro et Paulo, ad locum Cluniacum, cui domnus Odilo abba preest: hoc est illum mansum quem Achinus tenet, in villa Salenciaco juxta Verreriam; alium etiam mansum in villa Cucuias, quem tenet Bernardus, servus meus; aliam etiam vineam quam actenus contra illos habui, quam etiam Durannus cellararius illorum tenet, reddo eis, ut ab hodierna die absque contradictione ullius mortalis hominis illam teneant et possideant. Mansum etiam quem Sigbrannus tenet in Monte, post decessum meum dono eisdem, et in vestituram unum multonem omni anno, quamdiu vixero. Uxor quoque mea Helisabeth donat eidem loco pro remedio anime sue et remedio omnium peccatorum nostrorum, unam vineam quam dicunt ad Plantas subtus Juliaco, post mortem suam, ut Deus omnipotens misereatur anime patris sui et matris sue, et omnium parentum nostrorum vivorum ac mortuorum. Hugo et Walburgis, et uxor sua, fac[iunt] guerpicionem de potestate Terviaco, illas torturas que ille querelat, post mortem suam, [ut] nullus homo, nec filios suos vel filias nullam rem inquirat, et si hoc faciat, ira Dei componeat. Hugo et Gualburgis et uxor sorua Helisabeth, qui fieri et firmare rogavit. S. Walburgi, S. Helisabeth, filias Hugoni. S. Alo. S. Astaldi. S. Uberti. S. Achi. S. Gislardi. S. Willelmus de Civino. S. Duranni de Pozolas. S. Duranni vicarii. Rotbertus, cognomento Bochardus, filius Willelmi, fecit guerpitionem Sancto Petro, alte altare ejus de Cluniaco, de hoc quod hic scriptum agnoscitur.