In nomine Verbi incarnati. Noverint cuncti Christi caractere insigniti, quod ego Ugo, pro remedio animarum patris vel matris meę, et ut Dominus qui ex minimis maxima et ex transitoriis sempiterna largiri consuevit, mihi in presenti et in futuro recompensationem mercedis dignetur tribuere, cedo eidem Domino Deo et sanctis ejus apostolis Petro et Paulo, ad locum Cluniacum, sub regimine domni Odilonis abbatis constitutum, aliquid ex rebus meę proprietatis, videlicet unum campum quem ego comparavi de mea amitta Auxilia, situm in Monte Bosonangis, in tali tenore ut, quamdiu mihi comes vita fuerit, teneam et possideam, et post meum obitum, prefato loco deveniat. Habet autem in longum perticas XI, et LX in latum; terminatur tribus partibus de ipsa hereditate, et de quarta via publica. Si quis vero fuerit, quod omnino fieri non credo, qui hanc cartam velit calumniari, non vindicet quod petit, sed iram omnipotentis Dei incurrat, nisi ad congruam satisfactionem venerit. In vestitura autem dabo omnibus annis prefati loci habitatoribus IIII^or sextarios de vino. S. Ugonis, qui istam donationem fieri et firmare rogavit. S. Gocseranni. S. Oldeveni, Gogseni, Eldini, Gosfredi, Gitberti.