Charta qua Aremborga dat monasterio Cluniacensi tres curtilos cum servis in villis Bucsiaco et Salmodei.
Divina pietate et misericordia concessum est unicuique mortalium, ut ex rebus temporalibus adquirere sibi valeat ęternę beatitudinis premium. Hoc itaque sollicite perpendens et diligenter considerans, ego Aremborga nomine, pondusque proprię infirmitatis et peccatorum reminiscens, jamjamque finem vitę instare non ignorans, facio hanc donationem, pro redemptione animę meę omniumque parentorum meorum ac filiorum, Deo proprio conditori et redemptori, sanctisque ejus apostolis Petro et Paulo et Cluniensi monasterio in eorum honore consecrato, cui preest domnus Odilo abbas, de quadam terra mei juris et proprietatis, quę sita est in Matisconensis et Lugdunensis episcopatibus, in villa Bucsiaco, unum curtilum cum vinea et unum servum, nomine Constabulum, cum matre sua Ingelborga, qui excolunt eum. Hic habet terminationes terra Sancti Vincentii, a vesperi terra vescontalis. Dono etiam in villa Salmodei unum curtilum cum piscaria et omnia ad se pertinentia, et servum, nomine Winivaldum, cum uxore sua, nomine Rainelda, et infantibus illorum. Habet terminationes a mane de ipsa hereditate, a meridie terra francorum, a vesperi terra Sancti Vincentii, ab aquilone via publica. Dono vero unum curtilum in ipsa villa, quem tenebat Salvatus, cum piscaria et omnia ad se pertinentia, qui terminatur ex omni parte terra francorum. Hęc omnia dono pro remedio animę meę, et in locum sepulturę. Si quis autem scindere aut calumniari voluerit quod e mea propria dono hereditate, iram incurrat Omnipotentis, nisi ad emendationem venerit, et deinceps hęc firma et stabilis permaneat, cum stipulatione subnixa. S. Aremborgę, quę fieri et firmare rogavit. S. Wigonis, Attonis, Jozeranni. S. Willelmi et filiorum ejus. S. Azonis, Jozę, Wichardi.