Omnibus sub norma chatholicę fidei degentibus notum et manifestum sit, quod ego Gauslenus miles, considerans pondus meorum peccaminum, dono Deo et sanctis ejus apostolis Petro et Paulo, ad locum Cluniacum, de mea hereditate, quę est sita in pago Cabilonense, duos videlicet mansos cum omnibus quę ad ipsos mansos aspicere videntur, qui conjacent in villa Cintiliaco; in tali conventu, ut si ego sine legali herede mortuus fuero, monachi de Cluniaco de ipsis faciant quicquid facere voluerint. Unum mansum tenet francus nomine Areis, et alium servum, vocabulo David. Dono etiam alium mansum in villa Ciconias quę est sita in episcopatu Matisconense, cum servo nomine Bernardo et filiis et filiabus ejus. Hunc autem mansum et hunc servum in tali dono convenientia, ut quamdiu vixero teneam et possideam; post meum vero discessum a seculo, monachi in proprios usus accipiant. Pro his autem omnibus dono ad presens in vestitura unum campum in villa Cintiliaco, quem dicunt ad Belosas. S. Gausleni, qui hanc cartam fieri precepit. S. Anselmi, Widonis, Huberti, Hugonis, Tetbodi, Arlerii, Rodulfi.