Charta qua Odilo, abbas Cluniacensis, notum facit se Leoto militi cellarium in castro Lordono quod fuit Achardi, fratris ejus, concessisse.
Notum sit cunctis tam presentibus quam futuris, quod ego frater Odilo, abba Cluniensis, consentientibus fratribus, dono huic militi, nomine Leoto, cellarium fratris sui Achardi in castro Lordono, ut ibi mittat panem suum, et vinum et quęque sibi necessaria, tali conventu, ut quandiu vixerit, teneat; et post ejus obitum, cum omnibus quę in eo inventa fuerint ad Sanctum Petrum perveniat. S. Odilonis abbatis. S. Almanni. S. Heinrici. Et ex alia parte: S. Leotaldi, Gausfredi, Artaldi.