Charta qua Wigo, filius Eldini, dat monasterio Cluniacensi mansum in villa Verziaco.
Sacrosancto et exorabili loco Cluniaco, in honore beatorum apostolorum Petri et Pauli constructo, cui preest dunnus abba Odilo, ego Wigo dono unum mansum quem pater meus Eldinus excamiavit a comite de Mascono, cum omnibus apenditiis suis, in villa quę vocatur Verziacus, pro remedio animę meę et omnium fidelium christianorum. Si quis calumpniare voluerit, nisi cito resipuerit, omni maledictione subjaceat. S. Wigonis, qui hanc donationem fecit et ipse firmavit. S. Oddonis, fratris ejus.