Charta qua Adza dat monasterio Cluniacensi vineam in villa Moloniaco.
In nomine Verbi incarnati. Noverint cuncti fideles ecclesie, qualiter
ego Adza dono Deo et sanctis apostolis ejus Petro et Paulo, ad locum Cluniacum, ubi preest dunnus Odilo abba, aliquid de hereditate mea, quę est sita in pago Matisconense, in agro Fusciaco, in villa Moloniaco, videlicet unam vineam terminatam a mane de ipsa hereditate, a medio die terra Sancti Petri, a sero via publica, a cirtio aqua currente: tali tenore, ut quandiu vixero usum habeam, omnique anno tempore vindemię II sestarios de vino in vestitura persolvam; post discessum vero meum, ad Sanctum Petrum perveniat, nullo contradicente. Qui autem contradixerit anathema sit, coactusque auri libras persolvat XII, ut postea carta donationis hujus firma permaneat et stabilis. S. Adzę, quę fecit et ipsa firmavit. S. Waremberti. S. Giroldi. S. Clementis.