Charta qua Maingodus notum facit se monasterio Cluniacensi mansum indominicatum et medietatem rerum suarum in villa Vallis dedisse.
Notum sit cunctis fidelibus, tam futuris quam etiam presentibus, quod ego, in Dei nomine, Maingodus, in extremis vitę hujus positus, dono Deo et beatis apostolis ejus Petro et Paulo, in monasterio Cluniaco, ubi dunnus Odilo abba preesse videtur, de mea hereditate quę est sita in episcopatu Matisconense, unum videlicet mansum in Vallis villa situm, indominicatum totum, et medietatem de omni mea hereditate in eadem villa sita, cum omnibus ad eam pertinentibus, silvis,
vineis, pascuis, campis, pratis, aquis aquarumve decursibus, exitibus et regressibus: in tali conventu, ut ab hodierno faciant rectores prefati loci quicquid voluerint. S. Gotdefredi. S. Bernardi. S. Constantii presbiteri. S. Adalardi.