Redemptor humani generis, providens nostrę saluti, instituit ut de terrenis cęlestia, de transitoriis mercemur ęterna, inquiens in Evangelio: «Thesaurizate vobis thesauros non deficientes in cęlo, ubi non consumit nec tinea nec erugo.» Quapropter ego Drogo dono Deo et sanctis apostolis ejus Petro et Paulo ad locum Cluniacum, aliquid de mea hereditate quę sita est in pago Matisconensi, in villa Bugdono: hoc est unum campum qui terminatur ex omni parte terra Sancti Petri; sed de una parte est sita terra Eldrici et Magberti. Et in villa Verolias do unam vineam quę terminatur a mane terra Adoardi, a medio die terra Sancti Petri, a sero terra Adoardi, a circio terra Sancti Petri Chedrellensis. Dono etiam duos servos, unus vocatur Girbertus, alter Odaldus, et sororem eorum Letildim. Facio autem hanc donationem pro anima matris meę Radvisę, ut Dominus pro sua pietate concedat ei requiem felicitatis ęternę. Si quis autem huic nostrę donationi calumniari presumpserit, excommunicationi subjaceat, et vendicare non valeat quod expetit. Et ut firmius permaneat, manu propria firmavi, testibusque roborandam tradidi. S. Drogonis, qui fieri firmareque rogavit. S. Gisleberti, Aremberti, Witberti, Maingaudi, Albuini, Widonis. Actum Cluniaci publice, regnante Rotberto rege.