Charta qua Gausbertus sacerdos dat monasterio Cluniacensi quasdam res in villis Maxiliaco et Colonias.
Sacro loco Cluniensi. Ego Gausbertus sacerdos dono ad eundem locum curtilum unum in villa Maxiliaco cum vinea insimul tenente, qui terminatur a mane et a circio via publica, a mædio die terra Aydoardi, a sero terra Arlei; et in ipsa villa campum unum qui ad Cassanetas vocatur, et terminatur a mane increpito, a medio die terra Sancti Johannis, a sero Sancti Vincentii, a circio Aydoardi. In villa Colonias vineam unam, quę terminatur a mane terra Sancti Petri de Marziaco, a medio die Sancti Petri de Cluniaco, a sero similiter, a circio via publica; et alium campum qui a Budel vocatur. S. Gausberti, Arleii, Gunterii, Itberti, Amandi, Dodonis, Soffredi, Azellini. Actum Maxiliaci publice, regnante Rodberto. Istud facio pro anima patris mei et matris et parentum meorum.