Divina mortalibus clementia concessum est, ut de terrenis et transitoriis mercentur ęterna et cęlestia. Quod ego Richardus cogitans, enormitatemque meorum peccaminum reminiscens, et extremi judicii diem expavescens, dono Deo et sanctis ejus Petro et Paulo, ad locum Cluniacum, pro remedio animę meę, unum mansum quem de Vuicardo et Almodę adquisivi: et est situs in pago Augustidunense, in villa Oiadellis, ubi Constantinus manere videtur, et quicquid ad ipsum mansum aspicit, vineas, prata et campos; et in villa Vernolio dono illam terram totam quę in ipsa villa conjacet, quam de Bernardo conquisivi. Hęc omnia dono pro salute animę meę, ut Dominus, pro sua pietate, interce[de]ntibus sanctis suis, concedere mihi dignetur indulgentiam omnium peccatorum meorum et in futuro sociare dignetur numero ęlectorum suorum; et ut ista carta firma permaneat, manu propria firmavi testibusque tradidi roborandam. S. Richardi, qui istam donationem literis annotare testibusque firmare rogavit. S. Magberti presbiteri, Vulferii, Bernardi, Aimonis. Actum Cluniaco publice, regnante Rotberto rege.