In nomine sanctę et individuę Trinitatis. Ego Livo dono Domino Deo et sanctis apostolis ejus Petro et Paulo, ad locum Cluniensis monasterii, ubi domnus Odilo abba preesse videtur, curtilum unum cum vinea in villa de Segia, et est ipse curtilus in comitatu Matisconensi, terminaturque de duabus partibus terra Bernardi, a mane via publica, a sero terra Sancti Petri. Infra istas terminationes, dono ad locum jam supradictum in elemosina, pro remedio animę meę, ut habeant rectores loci memoriam de me. Sane si aliqua persona id inquietare voluerit, iram Dei omnipotentis incurrat, et cum Juda traditore sit particeps in inferno. S. Livonis, qui hanc cartam firmavit et fieri jussit et firmare rogavit. S. Guitberti, Eldini, Eldradi, Noę, Constantini, Tetelmi, Rotberti, Letaldi. Accipio de monachis triginta solidos in precium. Facta est hęc carta, mense junio exeunte, pridie kalendas julii, in atrio ante ęcclesiam, regnante Rotberto rege Francorum.